Ndërrimi i shpeshtë i trajnerëve në KF Hysi nuk e frikëson aspak pedagogun e njohur Hysni Maxhuni, i cili aktualisht është trajner i kësaj skuadre. Ai është trajneri i tretë i skuadrës nga Merdara në këtë kampionat, pasi më herët ishin edhe Muharrem Sahiti dhe Luan Prekazi.

Maxhuni ka thënë se ka ardhur në krye të skuadrës me qëllimin e vetëm, që kampionatin ta përfundojë si trajner i kësaj skuadre.

“Unë kam ardhur në krye të kësaj skuadre me qëllim që ta përfundoj kampionatin këtu. Shpresoj se një gjë e tillë do të ndodhë”, ka thënë Hysni Maxhuni, i cili është rikthyer në krye të skuadrës më 16 dhjetor të vitit të kaluar.

Skuadra e Hysit, që është shpallur fituese e Kupës në kampionatin e kaluar, synon që një gjë të tillë ta bëjë edhe në këtë kampionat. Tekniku kërkon me ngulmë që suksesi i skuadrës mos të jetë vetëm Kupa, por edhe titulli i kampionit.

“Kemi skuadër të kompletuar. Nëse futbollistët shpëtojnë nga lëndimet, suksesi ynë mund të jetë i dyfishtë. Mirëpo edhe skuadra e Trepçës, që është kandidate për titull, ka futbollistë të shkëlqyeshëm”, ka shtuar Maxhuni, i cili është i vendosur që asnjë futbollist të mos inkuadrohet në përbërjen e parë pa e merituar.

Skuadra e Hysit, e cila në këtë afat kalimtar është përforcuar me mesfushorin Yll Hoxha dhe mbrojtësit Fisnik Papuqi dhe Drilon Dragusha, më 3 shkurt do të udhëtojë për në Gjevgjelis, për ta zhvilluar fazën e dytë përgatitore, kurse pritet të rikthehet më 15 shkurt.

Veton Zymberi